ОСНОВНА  ШКОЛА »ЈОВАН  ЈОВАНОВИЋ ЗМАЈ«  ЂУРЂЕВО

ОСНОВНА ШКОЛА »ЙОВАН ЙОВАНОВИЧ ЗМАЙ« ДЮРДЬОВ

ҐЕОҐРАФСКЕ ПОЛОЖЕНЄ

Нєшкайши валал Дюрдьов ше находзи южно од Жаблю и вон єдно спомедзи штирох местох у жабельскей општини. През Дюрдьов преходзи важна шайкашска драга хтора повязує Тител зоз Жабльом. Вельке значене за место ма и блїзкосц маґистралней драги хтора повязує Жабель з Новим Садом, а Нови Сад, тиж прейґ Жаблю, зоз Зренянином. За Дюрдьов важна и блїзкосц желєзнїцкей драги зоз хтору повязани три населєня: Жабель, Чуруґ и Ґосподїнци.

Ґеоморфолоґийни и климатични обставини того валала заєднїцки за цалу општину Жабель, та их и мож розпатрац лем у тим контексту. Територия општини Жабель ше пресцера на лесней тераси и алувиялнеи ровнї Тиси. Лесна тераса ше состої зоз леса, хтори груби од трох до пейцох метерох, а у подлоги леса жовта иловача. Висина лесней тераси на поєдиних местох тей териториї розлична, а у хотаре Дюрдьова ше руша медзи 82 и 83 метери. Цо ше дотика алувиялнеи ровнї Тиси, вона найнїзша на териториї општини Жабель. Єй стредня надморска висина виноши на сивере 75, а на кругу 74 метери. Юговосточно од Жаблю и восточно од драги Жабель-Дюрдьов ше пресцера слабо виражена алувиялна тераса. Вона барз розчленєна та нєт ровни пиверхносци, але то менєй-вецей писковити брещки и яруги, лучней форми, хтори углавним ориєнтовани спрам алувиялнеи ровнї Тиси. Єдно з найвекших углїбеньох Девень, хтори почина сиверно

од Дюрдьова под назву Копово¹.

КЛИМАТИЧНИ ОБСТАВИНИ

З оглядом на векши розлики медзи лєтнїма и жимскима тем­пературами, жабельска општина ма баржей континенталну як умерено-континенталну климу. Найцеплєйши мешац юлий зоз стредню температуру 21,7 °С, а найжимнєйши януар зоз стредню температуру -1,8 °С. Розлика у температури медзи юлийом и януаром виноши 23,5 °С , цо клими жабельскей општини дава баржей характеристики континенталней як умерно-континенталней клими.

РОШЛЇНСКИ И ЖИВОТИНЬСКИ ШВЕТ

Климатични обставини и природа жеми подруча на хторим ше находзи нєшкайши Дюрдьов створели барз вигодни условия за розвой рошлїнского швета. Коло валалу ше пресцераю прекрасни пространи пажици, а окремий печац вкупному пейзажу даваю древа, хтори єст барз вельо. Найчастейши файти тополя и верба, баґрени єст менєй, а плавну улїцу украшую посадзени шори лїпох. Плодна жем дюрдьовского хотара оможлївює ховац велї рошлїни хтори ше хасную за людске єдзенє, за прерабяцку индустрию и статкову покарму. Спомедзи житаркох ше нєшка найвецей шеє жито, меней ярец и овес, потим кукурица, слунечнїк и други култури. Дюрдьов пред двацец роками бул познати по продукциї гращку, а остатніх рокох ше од заградкарских рошлїнох найвецей садзи паприґа, парадичи и кромплї. Дюрдьовчанє нєшка барз поз­нати як продуковаче ґереґох и диньох, хтори пласую ширцом Войводини, та и до других крайох нашей жеми.

Досц розвите и статкарство, гоч не так як пред двацец рока­ми. Спомедзи дзивих животиньох у месце односно його околини жию муша, паткань, їж, кертица, дзива качка, фазан, тащок, врана, дзиви голуб и др. Блїзкосц рики Тиси оможлївює жительом уживац у риболове на потьку, чуку, терпеша, златного караса итд.

ПОДЖЕМНИ ВОДИ И ПОДМИРЙОВАНЄ З ВОДУ

За цалу Шайкашску характеристични нєпреглядни поверхносци плодней жеми, хтори главне природне богатство того краю. Под ценким пасмом жеми скриваю ше и други природни богатства. Економске значене спомедзи нїх ма жемни газ и лес, хтори ше хаснує як сировина у цеглярскей индустриї. Сущни ґеолоґийни витвор и поджемни води, хтори ше хасную за подмирйованє з воду и други цилї. Вони ше зявюю на розличних уровньох. Под плїтким жридлом ше подрозумюю води хтори ше зявюю на менших глїбинох, а поджемни води тоти хтори ше зявюю на вецей уровньох и на вельо векшей глїбини. И попри факта же тото подруче вше було богате з поджемнима водами, подмирйованє жительства скорей було на барз нїзким уровню. До седемдзешатих рокох того вика найвекша часц жительства хасновала воду за пице зоз плїтких копаних або цивових студньох плїткого жридла, хтора часто була бактериолоґийно нєисправна.

Часц жительства хасно­вала воду зоз субартерских водоносних горизонтох хтора дакус квалитетнєйша и исправнєйша у хемийним и бактериолоґийним поглядзе. Найменєй було заступене подмирйованє зоз глїбших артерских горизонтох. У Дюрдьове 1968. року було 12 явни студнї, хтори черпали воду зоз субартерских горизонтох, з глїбини од 70 до 90 метери. Нєшка ше вецей не хаснує анї єдну з нїх. Од 1970. року у валалє ест водовод.