ОСНОВНА  ШКОЛА »ЈОВАН  ЈОВАНОВИЋ ЗМАЈ«  ЂУРЂЕВО

ОСНОВНА ШКОЛА »ЙОВАН ЙОВАНОВИЧ ЗМАЙ« ДЮРДЬОВ

ПЕРША ШВЕТОВ А ВОЙНА И ЗЄДИНЄНЄ

На Видовдан, 28. юния 1914. року член Младей Босни Ґаврило Принцип окончел атентат на австрийского престолонашлїднїка Франца Фердинанда. Австро-Угорска прето мешац днї познєйше обявела Сербії войну, хтора нєодлуга постала шветова. У тим вельким воєним зраженю участвовали 28 держави, ґруповани до двох союзох: на єдним боку були Централни сили (Австро-Угорска, Нємецка, Болгарска, Турска), а на другим сили Антанти: Французка, Велька Британия, Русия, Италия, ЗАД, Сербия). Були формовани штири фронти: Заходни, Восточни, Балкански и познєйше Солунски. На тих фронтох водзени чежки борби аж до 11. новембра 1918. року, кед Перша шветова война закончена з капитулацию Централних силох (Австро-Угорска капитуловала 3. XI, Нємецка 11. XI 1918. року).

У чаше кед почала тота война вельких розмирох Шайкашска була у составе Австро-Угорскей. Мобилизация у Шайкашскей окончена 26. юлия 1914. року, кед зоз тих крайох на фронт спрам Сербиї послани понад 5 000 вояци. Треба повесц же обява войни Сербиї и мобилизация войска спричинєла страх сербского жительства од прешлїдованьох, та прето Серби у велїх местох добродзечно давали власцом вияви лоялносци, т. є. же оставаю вирни „нєщешлївому царови и кральови" Францови Йосифови и „оцовщини Угорскей"⁵⁶. Медзитим, уж после перших нєуспихох австро-угорского войска на чолє з Генералом Потьореком велї Серби з Войводини на рижни способи сцекаю з того войска и преходза на бок сербского. Теди ґу сербским єдинком прешли коло 2 000 жителє Шайкашскей. Прето австро-угорски воєни власци бу­ли примушени остаток Сербох зоз Шайкашскей преруциц на Восточни фронт спрам Русиї. Нєодлуга и там понад тисяч вояци вихасновали першу нагоду же би прешли на бок русийского войс­ка. У Русиї зоз сербских дезертерох формована Сербска доброволєцка дивизия, хтора участвовала у познатих биткох у Добруджи и на Солунским фронту. Тоти Серби хтори остали у составе Сербскей армиї дожили шицки страхоти у преходзе през Сербию, Чарну Гору и Албанию док не дошли на Крф. На тей дра­ги даскельо дзешатки вояци зоз Шайкашскей помарли од ранох и хоротох. Не познате нам келї Дюрдьовчанє були медзи тима шайкашскима борцами хтори прешли на бок сербского войска, але сиґурно мож повесц же ше найвекша часц борела на боку австро-угорского войска.

На Велькей народней скупштини, хтора отримана 25. XII 1918. року, Войводина приєдинєна ґу Сербії, а 1. XII вєдно зоз ню вошла до Кральовини Сербох, Горватох и Словенцох. Посланїки на Народней скупштини зоз Дюрдьова були: др Дьордє Дундєрски, Дьордє Дїтков, Дьордє Зличич, Дьордє Илин, Андри Киш-Адамов и Микола Гаргаї⁵⁷.