ОСНОВНА  ШКОЛА »ЈОВАН  ЈОВАНОВИЋ ЗМАЈ«  ЂУРЂЕВО

ОСНОВНА ШКОЛА »ЙОВАН ЙОВАНОВИЧ ЗМАЙ« ДЮРДЬОВ

ПРЕДСЛОВО

По нєшка нє обявена анї єдна публикация хтора обрабя прешлосц валала Дюрдьова у цалосци, анї поєдини периоди и збуваня з його историї. То, медзитим, нє значи же ше у постояцей литератури нє спомина прешлосц того населєня, Напроцив, досц авторе статьох и прилогох у часописох, рочнїкох и моноґрафских творох наводза значни податки з историї Дюрдьова, засновани на архивних материялох и других историйних жридлох. Медзитим, же би ше здобуло голєм приблїжну слику о тим месце, требало досц усиловносци и часу же би ше з публикацийох позберало факти хтори би - синтетизовани до єдней цалосци -створели общу слику о прешлосци того населєня.

Праве то була причина же би ше пририхтало єдну публикацию, своєродну синтезу по тераз познатих и презентованих податкох зоз историї Дюрдьова од його наставаня до 1941. року. Єдна з причинох бул и ювилей, 250 роки приселєня Руснацох на тоти простори, хтори ше означує того року. Автор тей кнюкки нє мал можлївосци окончиц обсяжнєйши и нови виглєдованя, так же углавним рушал од постояцей литератури и приповеданя старших Дюрдьовчанох.

Най тота кнїжка будзе порив младим, хтори одросли у тим валалє и остали емотивно вязани за ньго, же би написали моноґрафию Дюрдьова хтора би ширше облапела його прешлосц од найстарших часох по нєшка. Дотля, наздавам ше, тота пуб­ликация будзе хасновац шицким Дюрдьовчаном же би лєпше упознали прешлосц свойого родзеного места.

Сердечно дзекуєм шицким хтори ми давали драгоцени податки вязани за прешлосц нашого валала. Окреме сом подзековна покойному оцови, Якимови Мункачовому, хтори ми од початку давал моралну потримовку у тей роботи.

Автор