ОСНОВНА  ШКОЛА »ЈОВАН  ЈОВАНОВИЋ ЗМАЈ«  ЂУРЂЕВО

ОСНОВНА ШКОЛА »ЙОВАН ЙОВАНОВИЧ ЗМАЙ« ДЮРДЬОВ

ПРИВРЕДНИ ДЇЯЛНОСЦИ ШАЙКАШОХ У ДЮРДЬОВЕ

ОД ПОЧАТКУ XIX ВИКА ПО 1918. РОК

Територия Шайкашскей од вше була першенствено польопривредни край. Медзитим, у Шайкашским батальону були розви­ти и даєдни нєаграрни дїялносци, хтори були подредзени потребом польопривреди. У Шайкашскей було досц ремеселнїкох, коло трицец фахох. О fie дїялносци єст, на жаль, податки лем до першей половки XIX вика. У Дюрдьове робели шлїдуюци ремеселнїки: Ґеорґиє Михайлович, кушнїр, Єфта Филипович, кушнїр и Исак Калаїч, кушнїрски калфа. Уж после 1826. року єст менєй податки о кушнїрох у Дюрдьове. Од 1818. до 1826. найвецей податки єст о скравцох. То були: Стеван Салотак и Карло Салонтаї. Спомина ше и чижмар Михайло Йованов. Року 1826. у валалє робел коваль Йосиф Хуґер, а од 1830. ше спомина коваль Лука Богданович. У першей половки XIX вика у Дюрдьове було даскельо тарґовцох и тарґовцох зоз статком. Тарґовец у предавальнї бул Тодор Мушицки, хтори 1825. року купел хижу од арендатора Йохана Вернера. Мушицки 1818. року мал 30 форинти поглєдованя од официра Калмана. Од истого официра мал поглєдованя и други тарґовец, Кузман Миленкович, и то 15 форинти. Ту бул и тарґовец Єфта Максимович, а од 1840. року и тарґовецки син Павле Костич ⁴⁸.

Медзи тарґовцами зоз статком 1833. року ше споминаю: Єремия Костич, Павле Чурчич, Йован Боґданов, Михайло и Чиро Ґайшин, Йован Шовлянски, Нестор Мушицки, Тимотиє Отич и Дюка Радишич⁴⁹.

Власци у Габзбурґскей монархиї ище од конца XVIII вика особлїву увагу пошвецовали пестованю гадвабней буби и розвою гадвабарства. Кельо гадвабарство було розвите у Шайкашскей потвердзує факт же уж 1804. року у Шайкашским батальону була посадзена 15 261 ягода. Команда Шайкашского батальона строго водзела рахунку о отримованю розсаднїкох ягоди, о їх защити од статку, як и о роботней моци за отримованє ягодох. Трицетих рокох XIX вика учителє були обовязни научиц дзеци основни знаня о пестованю гадвабней буби. И у Дюрдьове було посадзене вельке число ягодох. Зазначене же у Дюрдьове 1845. року випродуковани найвецей ґалетки гадвабней буби. Пестованє гадвабней буби було розвите у тим краю, та и у Дюрдьове, през велї роки, а престало аж по Другей шветовей войни.