ОСНОВНА  ШКОЛА »ЈОВАН  ЈОВАНОВИЋ ЗМАЈ«  ЂУРЂЕВО

ОСНОВНА ШКОЛА »ЙОВАН ЙОВАНОВИЧ ЗМАЙ« ДЮРДЬОВ

СНОВАНЄ И НАСЕЛЬОВАНЄ ДЮРДЬОВА

У перших рокох Шайкашского батальона у його гранїцох бу­ло вельо ерарскей (держвней) жеми, хтору требало обробиц, а постояце жительство то обєктивно не могло, бо шайкашски места були слабо населєни. Праве прето поднїмани перши крочаї з цильом насельовац на тото подруче нове жительство. Уж 1784. року Генерал Женейн у своїм допису Жемско-административней управи (Contons -Verwaltung) предложел же би ше у рамикох Шайкашского батальона формовало нови населєня и то на такв. жеми „Лопад" медзи Ґосподїнцами, Катьом, Ковильом, Сентиваньом и Жабльом, и на такволаней Надальскей жеми (Praedium Nadaly). Од тей инициятиви по єй реализацию прешли вецей роки. Аж вєшенї 1799. року ше з коморского валалу Темерину у Бачкей жупаниї приявели 203 фамилиї же ше жадаю населїц до Шайкашского батальону як „милитари". Уж 10. новембра 1799. ко­манда Шайкашского батальона явела Славонскей ґенералней ко­манди у Петроварадинє же би ше по єй допущеню од 2. октобра 1799. року за спомнути 203 фамилиї додзелєло 450 ланци жеми „Била бара" у обласци сентиваньскей општини за жимски шаца и же тота жем уж поорана и пошата.

Источасно Команда виявела же ше истим фамилийом додзелї ище 450 ланци на тей жеми за лєтнї шаца (просо и кукурицу). Попри понукнутих жемових поверхносцох з боку Команди, з розрахунку у виказу Шайкашско­го батальона видно же тоти фамилиї глєдали шлїдуюци поверхносци за одедзени намени: 4 800 ланци орачей жеми, 2 000 ланци пажицох, 1 600 ланци за винїци, 50 ланци за конопу, 50 ланци за леї (загради), 140 ланци за хижи (валал), ланц за теметов, 450 ланци за драги, 5 ланци за ягодару, 47 ланци як нєплодни елатини и 100 ланци за нєпредвидзени потреби. Вкупна поверносц жеми хтору глєдали тоти фамилиї виношела 9 543 ланци¹⁶.

Вкупна поверхносц жеми хтора була на розпокладаню за потреби нового жительства виношела 2 890 ланци. Остаток, 6 653 ланци, требало додац зоз других пригранїчних жемох. Славонска Генерал на команда у своєй одлуки од 16. новембра 1799. року одбила вимаганя приселєнцох. Вони, медзитим, и сами видзели же їх першобутни намаганя нєреални, та их зоз 9 543 зменшали на 6 923 ланци жеми, и то гевтей хтора ше состояла зоз шлїдуюцих пустарох: „Била бара" (у сентиваньскей обласци) - 1 720 ланци; „Нова Пашка" (у мошоринскей обласци) - 1 288 ланци; „Клиса" (у обласци Йосифового Села - Жабель) - 1 485 ланци; „Бечкерек" (у ґосподїнскей и катькей обласци) - 2 430 ланци. Понеже тоту жем дотля хасновали тоти општини и то за малу аренду (вона виношела по ланцу лем 11 до 14 ґрайцари бечкей вредносци рочно), тим општином требало надополнїц жем на других местох. Так Команда Шайкашского батальона предложела же би ше як надополнєнє дало: сентиваньскей општини 517 ланци предия „Крстач" (у долньоковильскей општини) и 396 ланци зоз предию „Миклошевце" (у ґардиновацкей обласци); опшптини Йосифового Села (Жабель) дати 141 ланц зоз предию „Стара Пашка" (у мошоринскей обласци); ґосподїнскей општини дати 623 ланци, цали предиюм Вркайлов и 592 ланци зоз предию „Маґош" (у катькей обласци); катькей општини 1 215 ланци предию „Маґош". Мошоринска општина ше по своєй дзеки одрекла од надополнєня за 1 288 ланци хтори єй вжати.

Вєдно з таким предлогом прерозподзельованя жеми Шайкашски батальон поднєсол план по хторим би ше формовало валал и населєло нове жительство. Батальон предложел же би нови валал бул на жеми „Пашка" у обласци мошоринскей општи­ни.

Цо ше дотика социялней и полней структури жительох хтори плановали населїц ше зоз Темерину до нового валалу, вона була шлїдуюца: 817 хлопи (278 за воєну и 124 за домашню службу, 43 инвалиди, 370 леґинє и двоме паноцове) и 795 жени (420 одати и 375 нєодати), вєдно 1 612 души. Тоти фамилиї найвироятнєйше охабели у Темеринє свойо хижи и жем коло нїх, а до Шайкашскей не пришли цалком без маєтку. Тото ше твердзи на основи факта же зоз собу приведли 950 конї, 1 425 глави рогатого статку, 5 329 овци, 82 швинї и 514 кошнїци пчолох. Затераз не мож сиґурно твердзиц яки причини наведли тих Темеринцох же би напущели свойо обисца, але ше предпоставя же им було чежко подношиц прициски темеринского пана ґрофа Сеченїя, теришнього предсидателя Придворней комори, а источасно окончовани пробованя покатолїчиц сербске жительство. Ґроф Сеченї допущел преселєнє тим фамилийом под условийом же вимиря свойо обовязки спрам тамтейших власцох и же селїдба будзе наяр 1800. року, а же Славонска ґенерална команда будзе глєдац допущене од Дворского воєного совиту же би ше спомнуте преселєнє могло урядово окончиц. Царска дворка комора таке допущене дала 23.

фебруара 1800. року и источасно предложела же би тото нове населене три роки було ошлєбодзене од шицких державних порцийох (Freijahre). У своїм звиту царови Дворски воєни совит винєсол и тото питане. Ушлїдзела його одлука у хторей цар гварел шлїдуюце: „Допущуєм предложене преселєнє и примам на знане розказ хтори видати Славонскей ґенералней команди, о чим треба поинформовац Угорску канцеларию з доставяньом актох, же би тото преселєнє не було на чкоду порцийного фонда". Ґенерална команда достала налог же би на час набавела шицко цо потребне за правенє хижох, а шицки трошки населєнци познейше надополня держави¹⁷.

Зоз тим административни роботи вязани за снованє валала углавним були закончени. Новоосновани валал наволани Дюрдєво. О наставаню його мена ест вецей верзиї. Єдна з нїх (а найчастейше ше и спомина) тота же нови жителє почали приходзиц наяр 1800. року, и то на Дюрдєвдан.

Szent-György ше спомина у жупаниї Бач под меном Almás-Szent-Gyorgy 1350. року. Тото место було власносц фамилиї Футаки. Кед ше одала дзивка Денеша Футакия, припадло Андрашови Ируґдийови, але його синове 1350. року тото место знова дали Денешови Футакийови и його синови Иштванови. У турских тефтерох ше коло 1570. року споминаю штири порцийни хижи по назви Дюрдєвац (тераз Дюрдьов) у тителскей нахиї¹⁸.

Першобутне населене на месце Дюрдьова випатра же под турску власцу остало пусте и остало пустара до 1800. року. По Ваничекови¹⁹ ше того року явели 203 фамилиї. Назва места Gyürkén ше спомина 1513. року у Бачкей жупаниї з местом Boldvogasszonfalva (нєшка Ґосподїнци, медзи Жабльом и Римскима шанчевами), та прето не неможлїве же ше место Gyürkén находзело праве на месце нєшкайшого Дюрдьова а дакедишнього Almás-Szent-György²⁰.

Дюрдьов 1880. року мал 591 обисце и З 303 жительох, спомедзи хторих 2 794 були православна Серби, а 326 Руснаци21. Такой по снованю Дюрдьов одредзени за шедзиско компанийских власцох и вєдно зоз Сентиваньом (нєшкайши Шайкаш) творел єдну компанию (дотля Сентивань бул у компаниї з Жабльом).